Sikolinggwistikang Pilipino: Pananaw at Tunguhin

Abstract

Isa sa mga kaunaunahang pagkakabanggit sa anumang kaugnayan ng sikolohiya at ng wika sa kontekstong Pilipino ang pagkakabanggit dito ni Aguinaldo noong 1898 nang kaniyang pasalamatan ang tinawag niyang “los psicologos del verbo Tagalog” sa kaniyang mensahe sa pagbubukas ng Pambansang Asambleya sa Malolos, Bulacan. Matapos noon, napakadalang na makita o madinig ang pagkakaugnay o pagkakasama ng dalawang kataga o larangan—sikolohiya at wika.