Ang Daluyan: Journal ng Wikang Filipino ay isang pambansang refereed journal na monolingguwal sa Filipino. Naglalathala isang beses sa isang taon. Pangunahing layunin nito na paunlarin ang pag-aaral at pananaliksik tungkol sa wika, panitikan, at kulturang Pilipino, at pagyamanin ang diskurso sa iba’t ibang disiplina sa wikang Filipino. Bilang bahagi ng tunguhin ng SWF-UPD na isulong ang Filipino bilang wika ng saliksik, naglalaan o lumilikha ang Daluyan ng espasyo para sa tuloy-tuloy na intelektuwalisasyon ng wikang pambansa.
Ang Daluyan ay naglalathala ng mga orihinal na artikulo na dumadaan sa proseso ng double-blind peer-review. Ang mga manuskrito na isinumite ay inisyal na sinusuri ng lupon ng mga editor na binubuo ng punong editor, mga editor ng isyu, at tagapamahalang editor. Sa bahaging ito ay maaaring maglabas ng resulta kung ang isinumiteng mga manuskrito ay tanggap, nangangailangan ng rebisyon, o hindi tanggap. Ang mga manuskrito na pumasa sa lupon ng mga editor ay uusad para sa blind peer-review ng mga referee na binubuo ng dalawa o higit pa, kung kinakailangan. Ang mga referee na susuri ng mga manuskrito ay pinili batay sa kanilang kakayahan at kasanayan sa disiplina o anyong pampanitikan.
